Psalms 109

1O Dios a daydayawek, saanka nga agulimek, 2Ta darupendak dagiti nagdadangkes ken manangallilaw; agibagada kadagiti inuulbod a maibusor kaniak. 3Liklikmutendak ken agsasaoda kadagiti makapapungtot a banbanag, ken awan ti gapgapuna a dardarupendak.

4Kas supapak iti ayatko kadakuada ket daddadaelandak, ngem ikarkararagak ida. 5Dakes ti insupapakda iti kinaimbagko, ken kagurada ti ayatko.

6Mangdutokka iti maysa a nadangkes a tao a mangusig iti kabusor a kas kadagitoy a tattao; mangdutokka ti agpabasol nga agtakder iti makannawan nga imana. 7Inton maukom isuna, maduktalan koma a nagbasol isuna; maibilang koma a basol ti kararagna.

8Umabbaba koma dagiti aldawna; adda koma sabali a mangala iti saadna. 9Maawanan koma ti ama dagiti annakna, ken mabalo koma ti asawana a babai. 10Agalla-alla ken agpalama koma dagiti annakna, a dumawdawat iti aniaman a maipaima kabayatan ti ipapanawada iti nadadael a pagtaenganda.

11Alaen koma ti agpapautang dagiti amin a kukuana; takawen koma dagiti ganggannaet dagiti naurnongna. 12Awan koma uray maysa a mangidiaya iti kinaimbag kenkuana; awan koma iti mangngaasi kadagiti annakna nga naulilana. 13Matay koma dagiti annakna; mapukaw koma dagiti naganda iti sumaruno a kaputotan.

14Madakamat koma dagiti basol dagiti kapuonanna kenni Yahweh; ken saan koma a malipatan ti basol ti inanna. 15Kankanayon koma nga adda iti sangoanan ni Yahweh dagiti basolda; pukawen koma ni Yahweh manipud iti daga ti pakalaglagipan kadakuada. 16Aramiden koma ni Yahweh daytoy gapu ta saan pulos a pinadas daytoy a tao iti mangipakita ti aniaman a kinapudnona iti tulag, ngem ketdi, riniriribokna dagiti maidaddadanes, dagiti agkasapulan, ken dagiti awanan iti namnama agingga a matayda.

17Paggaayatna ti panagilunlunod, agsubli koma daytoy kenkuana. Kinagurana iti bendision; awan koma iti maiyeg a bendision kenkuana. 18Binadoanna ti bagina iti panagilunlunod a kasla kawesna, ken kasla danum a simrek iti kaunggan ti kinataona ti panagilunlunod, a kas iti lana a sumagepsep kadagiti tulangna.

19Agsubli koma kenkuana dagiti panagilunlunodna a kasla kadagiti kawesna a pangabbongna iti bagina, a kasla iti barikes a kankanayon a pagbarbarikesna. 20Daytoy koma ti gunggona dagiti mangpabpabasol kaniak manipud kenni Yahweh, kadagiti agibagbaga kadagiti dakes a banbanag maipapan kaniak.

21O Yahweh nga Apok, tratoennak a siaasi gapu iti naganmo. Isalakannak, gapu ta naimbag ti kinapudnom iti tulagmo. 22Ta marigrigatan ken agkasapulanak, ken nasugatan ti pusok iti kaun-gak. 23Agpukpukawakon a kasla ti aniniwan iti rabii; naipalpalaisak a kasla dudon.

24Nakapuy dagiti tumengko gapu iti panagayunar; agbalbalinakon a kudil ken tulang. 25Tinagtagibassitdak dagiti mangpabpabasol kaniak; agwingiwingda no makitadak.

26Tulongannak, O Yahweh a Diosko; isalakannak gapu iti kinapudnom iti tulagmo. 27Maammoanda koma nga aramidmo daytoy, a sika O Yahweh, ti nangaramid iti daytoy.

28Urayno ilunlunoddak, pangngaasim ta bendisionannak; inton dumarupda, maibabainda koma, ngem agrag-o koma ti adipenmo. 29Makawesan koma iti bain dagiti kabusorko; iyarwatda koma a kas kagayda ti panagbainda.

30Iyebkasko babaen iti ngiwatko ti naindaklan a panagyamanko kenni Yahweh; idaydayawko isuna iti nagtetengngaan dagiti adu a tattao. Ta agtakder isuna iti makannawan nga ima iti agkasapulan, tapno isalakanna isuna manipud kadagiti manguk-ukom kenkuana.

31